Deen or Dunya.

Mazhab kisi bhe shakhs ko define nahe karta. Mohazzib hone ka label kisi pe laga kar usay acha ya bura samjhna bilkul ghalat hai. 5 waqt ki namaz to har koi parh sakta hai, chand ahaadees bhe yad kar sakta hai, par deen ko absorb har koi nahe kar sakta. Or iske bar'aks, kisi ka namazi na hona usay fitri tor pe bura nahe banata. Duniya mein aese beshumaar log hain jo namaz or Quran ki pabandi nahe karte par insani huqooq ka behadh khayal rakhte hain. Lehaza, vo yaqeenan behtar insan hain. Apka mazhabi hona apko ye license hargiz nhe deta k aap dosron ko khud se kamtar samjhain. Kisi be namazi ko haqarat se dekhain. Apni ibadaton pe fakhar karna ibadaton ko zayal kardeta hai. Mene beshumar aese log dekhe hain jinke pas dars dene ko behadh ilm hai, amal karne ko kuch nahe. Baz log to ayatain or ahadees mauqay ki munasibat se istemal karke samne wale ko chup karwane ka hunar bhe rakhte hain. Jab khud sawal karte hain to jawab sunna chahte hain, jab dosra sawal karay to ayat ya hadees suna kar baat ko rafa dafa kardete hain.

Jab ibadatain maqbool hoti hain to insaan ki fitrat he palat jati hai. Uske andar se burai ka ansar mit'ta chala jata hai. Kis kaam ki aesi ibadatain jahan aap ne namaz k baad salam phera or gardan mor kar apne shohar se kaha, "Falan ki biwi ghar kitna ganda rakhti hai, shukar karein apko meri jesi safai pasand biwi mili, bara badqismat hai apka bhai". Namaz raigan, eeman zayal. Burai ki, gheebat ka gunah. Aib talash kia, iska gunah, ksi ko bura banaya, iska gunah, khud ko dosron se behtar samjha, iska gunah. Ek bat mein najane kitne gunah krliye. Or hasil kia hoa? Ksi aese shakhs ki tawajjah jo bina gunah k bhe apka he tha.

Huqooq Allah or Huqooq-ul-ibaad mein bohat farq hai. Pehle ki maafi to phir mumkin hai, dosre ki nahe. Or dekha jaye to hamari society ka general concept bhe yehe hai k namazi hai to sacha hai, hijaab karti hai to yaqeenan yehe sahe hai. Koi jeans pehni hoi larki dekhte hain to sochte hain k Allah se dur hai. Ghafil hai. Deen ki samajh nahe. Par kia malum k vo Allah se behadh qareeb ho, ksi namazi se bhe zyada, ksi haafiz se bhe zyada. Aap ki namazain apko utna he faiz deti hain jitna aap hasil karte hain. Warna namazain bas exercise ban jati hain. Jin ko namaz ka waqai faiz hasil hota hai vo awwal to kisi k aib nahe talashtay. Or agar koi aib ksi mein dikh jae to bas hidayat ki dua kardete hain. Jo waqai achay insan hote hain vohe sachay musalman bante hain. Kiun k acha musalman hamesha pehle acha insaan hota hai.

Fitoor

Chahy hum duniya pe lakh lanat bhej dein, par kahen na kahen kisi na kisi ki nazar mein acha banne ki chah humein pareshan rakhti hai. Na chahte hoe bhe hum achay or buray banne ki chakki mein pistay rehte hain. Yehe chahte hain k log acha samjhain. Tareefain krein. Lakin ye log humein kia de dete hain? Kia de sakte hain? Or agar acha ya bura samjhte bhe hain to is se kiya farq parta hai? Kia unke opinions ki basis pe hamari taqdeer badal jati hai? Amal namay badal jate hain? Jannat or dozakh ka intekhaab hojata hai? Koi acha samjhay to qismat chamak jati hai? Bura kahay to kiya hote hoe kaam ruk jate hain? Jab in sbh sawalon k jawab NA hain to phir kiun hamari zindagiyan inhee sochon k gird gardish karahe hain?

Ye jo acha bannay ki chah hoti haina, bohat buri tarhan ruswa karwadeti hai. Duniya mein bhe or akhirat mein bhe. Kis kaam ki apki ibadatain jahan aap ne namaz k baad salam phera or gardan mor kar apne shohar se kaha, "Akbar ki biwi ghar kitna ganda rakhti hai, shukar karein apko meri jesi safai pasand biwi mili, bara badqismat hai apka bhai". Namaz raigan, eeman zayal. Burai ki, gheebat ka gunah. Aib talash kia, iska gunah, ksi ko bura banaya, iska gunah, khud ko dosron se behtar samjha, iska gunah. Ek bat mein najane kitne gunah krliye. Or hasil kia hoa? Ksi aese shakhs ki tawajjah jo bina gunah k bhe apka he tha. Aap usay ksi or tarhan se bhe mutawajjah kar sakte thay. Phir ghalat rasta he kiun? Or mera mushahida hai, ese log zyada arsa duniya walon k agay bhe achay nahe rehte. Sunne wale ek din is bat ko realize kar he lete hain k is shakhs ki aadat aib-joi ki hai. Ye khud ghalat hai tabhe isko sabh ghalat lagte hain. Dosron ko gira kar khud khare hone ki koshish bekar hoti hai. Ek din sabh bhed khul jata hai or ruswai k ilawa kuch hasil nahe hota.

Or gunah sawab ek taraf, in tamam koshishon k baad bhe ye to humein kabhe pata he nahe chalta k akhir samne wala hamare baray mein raye kia rakhta hai. Kia pata jis shakhs se aap ek ghanta bat karke usay har mumkin tarhan se convince krahay thay k aap he sahe hain, vo aap ko Allah Hafiz kehte he sochay, kitna jhoota hai ye yaar. Or kia pata ksi se aap is fikar se baat na karhay hon k vo mujhe ghalat samjhta hai, or vo apko zamane bhar mein sahe kehta phir raha ho?

Ye sahe or ghalat, achay or buray ki jung he bekar hai. Har shakhs ko azad hona chahye. Befikar. Laparwah. Baaghi. Lakin aesa bhe to mumkin nahe. Mumkin to bas ye sabh sochna hai. Kiun k soch mumkin hojati hai, amal mushkil hota hai.

Judgement

Aaj kal log kitni aram se apne opinions ki basis pe dosron ki zindagiyan palat dete hain. Koi acha laga to bht gehra aqeeda bana lia k ye acha he hai, chahay vo kuch bhe karay. Koi bura laga to aqeeda bana liya k ye bura he hai chahay vo lakh achai karay. Apni judgement ko ghalat manne ko koi tayar he nhe hota. Or khud to mante he hain, logon k baray mein apne opinions pore confidence k sath propagate bhe kardete hain. Har shakhs khuda na-khuda k dairay mein ghoom raha hai. "Mujhe aesa laga", "Mene socha", "Mujhe mehsus hoa", "Mene aesa suna", "Mera khayal hai", "Mera 6th sense kehta hai", or najane aese kitne jumlay kitni zindaiyun se khel jate hain. "Vo to shakal se he itna tez lagta hai", "Zarur uske dimagh mein kuch chal raha hai", "Mujhe to sabh drama lagta hai", wagerah. Log kitni aram se kisi ki pori zaat ko ek fiqray mein samait kar apni judgement pass kardete hain. Ye judgement pass karne walon se agar ye kaha jaye k aap ki raye, sixth sense, apka jaiza agar ghalat sabit hoa to apke ksi bohat pyaray ka sar qalam kardia jaega, to kiya phir bhe vo apni judgement pe qaim rahenge? Ya peechay hat jaenge? Yaqeenan baat ko palat denge. Jis raye pe khud raye dene wale ko pora aetbar nahe, uspe sunne wale aetbar kiun kar lete hain?

Ghussa haram kiun?

Kabhe aap ne kisi rotay hoe bachay ko dekha hai? Jab usay shiddat ki zid ajaye, or vo dhaarain maar maar kar ro raha ho.. aesi soorat mein us bachay ki maa kiya karti hai? Goud mein utha kar seenay se laga leti hai. Dilasay deti hai. Chup karwane ki bharpor koshish karti hai. Beta ye lelo. Acha mein toffee dungi, chup to hojao. Hamaray Allah miyan bhe hamare sath yehe karte hain. Jab hum rote bilakte tarap rahe hote hain, zidd mein ajate hain, tab VO bhe humein aese he sambhal raha hota hai. Bas zid or ghussa humein andha bana deta hai to hum dekh he nahe patay k hamara Khuda humse kia keh raha hai. Hum dekh he nahe patay k VO humein kese thamay hoe hai. Ghussa isi lye haram hai. Kiun k vo aap ko andha bana deta hai. Aapki sochne samjhne ki salahiyat ko maaof kardeta hai. Log kehte hain k insan ghussay main voe bolta hai jo uske dil mein ho. Aesa nahe hai. Insan har cheez k do pehlu sochta hai. Acha bhe bura bhe. Ghussay mein sirf insan vo ugal deta hai jo vo sochta ho, zaruri nahe usko sahe bhe manta ho. Ghusa isi lye haram hai kiun k vo achai daba kar burai ubhaar deta hai. Ghusa humei Allah se dur kardeta hai. Hum ghussay mein, zid mein, mayusi mein dekh he nahe patay k Allah Pak humse kitna pyar karte hain. Vo 70 maon se zyada mohabbat karne wale hain. To zra sochiye, Vo kese apnay banday ko dukh mein tanha chor sakte hain?

Sabar ka inam.

Jo log mujhe yahan bachpan se jante hain vo pore eeman k sath is bat ki gawahi de sakte hain k kuch sal pehle tak vo jis hira ko jante thay vo mein nahe hun. Mera academic career hamesha se bht outstanding tha. School and college mein 1st position mere lye reserved rakhi hoi thee Allah miyan ne. Mera medical ka addmission bhe sirf test pass karlene se nahe hoa tha. Balkay mein pore Hyderabad mein 2nd or pore Sindh mein 7th position pe thee. Jab housejob ki to jis ward mei jati wahan yehe sunne ko milta k tum isi mein FCPS karna, tmhara to bohat aram se hojaega. Housejob khatam hone k 6 months bad shadi thee. Socha us se pehle he FCPS de dun. Fail hogaee. Shadi hoi, 2 maheenay bad miscarriage hogaya. Tab se life upside down hogayee. Mene jitna maslon ko suljhana chaha, ulajhte chale gae. Mein fitri tor pe bohat sensitive hon. Jo bat dosre sun kar bhol jate hain mujhe kayee dinon tak takleef deti rehti hai. Jab mujhe ye samjh agaya k mein pori dunya mein carpet nahe bichwa sakti, to mene khud paeron chappal pehen li. Apne aap ko badal liya. Sahe ghalat ki behes he chor di. Maslay suljhana chor diye. Sabh waqt k haeale kardiya. ALLAH pak se ek deal banai. Vo meri azmaish karte hain to uske badlay ka inam mein khud mang leti hun. Log dil dukhate hain to Allah miyan ko saaf keh deti hun, maaf nahe krungi ksi ko bhe. Phr do teen din baad ghussa thanda ho to unse kehdeti hun, abhe to bht dukh horaha hai, par maaf krdungi, waqt lagega, par uske badlay aap mujhe ye denge. Or yaqeen janain. Aesa lagta hai k vo sun kr muskura rahe hain. Meri bewaqoofi pe hans rahe hain. Par VO mujhe mana nahe karte. Unki azmaish khatam karne se pehle he mera tohfa mujhe de dete hain. Mera yaqeen bangaya hai k vo sabh dekh rahe hain. Kuch raigan nahe jaega. Ek aanso nhe. Ek aah nahe. Ek sabar ka ghont nahe. Vo har cheez ka badla denge. Mein jitna dukhon ko muthi mein dabaungi, dukh mujhe dabate jaenge. Islye mein do teen din bad muthi khol deti hun. Or hath khali kar deti hun takay tohfa miljae. Logon ka kiya hai, keh kar bhol jate hain to mein sun kar kiun yad rakhun? Mein ignore nahe kar sakti. Par jo jhel gayee uska sila zarur le sakti hun. Mera akhirat ka ajar hoga ya nahe, pata nahe. Log kehte hain Allah miyan se trading bhe ghalat hai. Par log kese judge kar skte hain mera or Allah ka rishta? Jo unko ghalat lag raha hai vo mujhe sukun de raha hai. Or ye sukun mera haq hai.

Sukun zaruri hai.

Insan k andar ka sukun sabh se ehem cheez hoti hai. Usko qaim rakhnay ki har mumkin koshish karte rehna chahye. Ek aesa insan jo khud besukun ho vo apne aas pas k logon k lye bhe wabal ban jata hai. Chahay vo admi ho ya aurat, biwi ho ya shohar, sas ho ya bahu, sukun har shakhs k lye zaruri hai. Apki chirchirahat sirf apko he aziyat nahe deti, aap k sabh rishte bigaar deti hai. Kuch log keh kar sukun mein ajate hain, kuch seh kar. Har kisi ka jeenay ka apna saleeqa hota hai. Isilye shayad zindagi guzarne k liye koi manual nahe hai. Kiun k hum sabh ek dosre se bht different hain. Kisi ko sabar ka nasha hojata hai to koi larh jhagar kar apnay aap ko pursukun mehsus karta hai. Andar andar ghutnay walay shakhs k sath bohat rishtay ghutan ka shikar horahe hote hain. Ek besukun shohar k sath uske biwi bachay pistay hain. Ek ghut'ti hoi beti k sath uske ma bap ghutan mein jeetay hain. Log bohat aram se keh dete hain k zra si zindagi hai, phir to sabh ne marna hy. To kiya zra si zindagi islye di gaee thee k maut k intezar mein roz maro? Allah ne humein zindagi maut ka intezar karne k liye nahe di. Aesa hota to rizq ki talash, ikhlaqiyat, taleem ye sabh humpe farz na ki jateen. Zindagi islye di gaee hai k khud bhe acha jiyo or dosron ko bhe jeenay do. Khush raho. Pursukun raho.

Qaid-e-khamoshi

Aj kal k daur mein tehzeeb do tarhan ki payee jati hai. Ek vo jo hum authentic ahadees, aqwaal-e-zarreen or taleem se seekhte hain. Dosri vo jo hum FACEBOOK se seekhte hain. Zyada tar awam mein dosri qism ki tehzeeb zyada pai jati hai. Or yaqeen janiye yehe log zyada kamyab bhe hote hain. Maslan thore din pehle kahen likha hoa parha tha k munh phat log dil k saf hote hain. Or khamosh rehne wale zehreelay saanp. Islam to humein zuban ko sambhal kar istemal karne ki taleem deta hai. Sara deen ikhlaqiyat k gird ghom raha hai. Baarha yehe dohraya jata hai k kisi ki dil aazari na karo. Kisi ko lafzon se chot na pohanchao. Phir munh pe apko bura bhala kehne wala sahe kese hoa? Jo kuch bhe bol kar dil dukha de vo khud dil ka saaf kese hoga? Bachpan se sunte arahe hain k koi baat buri lagay to sabar karo, khamoshi ikhtiyar karo. Ek chup sau sukh. Phir is aqeeday se khamosh hone wala zehreela saanp kese hoa? Aqal tasleem nahe karti par haqeeqat yehe hai k bol kar guzar jane wala utna bura nahe banta jitna chup reh kar seh jane wala ban jata hai. Ek to chup reh kr sehne ka dukh or phir apne andar qaid lafzon ki aziyat, dono insan ko andheron mei dubo detay hain. Apni he khamoshi mein qaid hone wale ko kisi k bhe alfaaz azaad nahe karwa sakte hain. Is qaid se rehai bas koi moaj'za he dila sakta hai.

Pathar Dil

Logon se milne wale mashware aksar baray herat angaiz hote hain. Maslan, log kehte hain k susral mein survive karne k lye diplomacy apnani parti hai. Politics ka hissa banna parta hai. Aese logon se mera aksar yeh sawal hota hai k aese rishte kis kaam k jinhain mohabbat ki bajaye diplomacy se apnana paray? Aese log kis kaam k jin k lye insan ko hypocrite banna paray? Ksi ko apne depression ka haal sunao to vo kehta hai mahol badal lo, achay environment mein raho, kiya mahol badal lena itna aasan hota hai? Kahen apko samajhne wale na hon to wahan se bhaag jana asan sa kaam hai? Hum ksi bhe jagah se nikal kar kahen bhag nahe sakte. Apne kanon k parday nahe phaar sakte. Jahan hain wahen reh kar sabh sunna or jhelna parta hai. Jis insan k andar dil dharak raha ho usko ye mashwara dena k ek kaan se sun kar dosre se nikal do, kahan ki aqalmandi hai? Dharakta dil har bat ko catch karta hai. Or phr usay kayee dinon tak pakar kar betha rehta hai. Or hum kuch nahe kar skte. Ignore nahe kar sakte. Kisi ne aap pe ungli uthai, dil dukhaya, ab chahy lakh duniya apko samjha le par lakhon logon ki bat ek taraf hojati hai. Vo ek baat dil mein chubhti rehti hai. Kayee dinon, maheenon, salon tak. Insan se pathar banne ka safar bohat taweel hota hai. Bohat kam log manzil tak pohanch patay hain. Zyada tar manzil se pehle he, maut se pehle he, mar jate hain.

Apne kirdar mein hum log farishta hon jaise.

Hazaron aib dekhte hain hum Dosron ke pehlo main
Apne kirdar mai hum log farishte hoon jaise

Is sher ko parhiye. Zara ghaur se parhiye. Bohat aam si bat likhi hai is main k hum dosron k aib dhondte hain jese khud farishta hon. Par ye baat itni aam si bhe nhe jitni dikhai de rahe hai. Hum insanon mein koi bhe farishta nahe hai. Ho he nahe sakta. Kiun k farishtay har gunah se paak hain. Pr Allah Pak ne humain farishta nahe insaan banaya hai. Islye hum mein khamiyan bhe rakhi hain. Par hum mein se kitne log is bat ko man kar apni buraiyan tasleem krte hain? Shayad 1% ya 2% bhe nahe. Hum namaz parhte hain. Allah taufeeq de to har sal ramzan mei Quran bhe parh lete hain. Dunya ko deen sikhate hain. Facebook ki wall ko har tarhan ki ahadees, qoul or tehreeron se bhar lete hain par amal kiya karte hain? Kuch nahe. Hum sabh k andar munafiqat ka ansar hai. Jisay hum manne ko tayyar nahe. Ye sbh batain humein sirf dosron ko kehne or khud ko mazloom banane k lye achi lagti hain. Amal k waqt hum mazloom ban kar Allah k insaf pe sbh se kamil eeman rakhne wale ban jate hain. Zra lamhay ko ye sochne ko tayyar nahe hote k hum bhe ghalat hosakte hain? Agar har shakhs yehe soch kar ji raha hai k vo sahe hai par sari dunya uski baghawat karahe hai to asal mein ghalat hoa he kon? Koi nahe. Ksi andheray kamray mein akele beth kar khud ka jaiza lain. Apna side na lain. Bas apna jaiza lein. Bht se raaz khul jaenge. Bht se sawalon k jawab bhe milenge. Aqal-o-shaoor humein isi maqsad k lye di gaee hai. Par aqal ka istemal hum sirf ye sochne k lye karte hain k sbh azmaishain hamare he hissay main kiun. Har cheez azmaish nahe hai. Bht kuch un gunahon ka kuffara bhe hota hai jo janay anjanay main hum se hojate hain. Har insaan mein aib hai. Mujh mein bhe aap mein bhe. Lehaza, mazloom zarur banain. Par pehle thore se insaan banjaen.

Doctor Bahu

Aik sahab kuch arsa pehle hamare ghar tashreef laye. Meri unse pehli mulaqat thee. Kuch salam dua k baad pochay aap ne kahan tak parha hai. Mene kaha meine MBBS kiya hai. Baray afsos k sath bolay, "Oh ho, ek seat or zaya". Mene pocha vo kaisay. Bolay larkiyan uchal uchal kar Medical mein to chali jati hain, baray achay marks lekr Doctor ka laqab bhe le leti hain, par sach pocho to bas seat he zaya karti hain. Shadiyan karke gharon pe beth jati hain. Miyan or bachon ko palne. Hogayee na seat zaya? Jawab to tha mere pas dene k lye par mein unki bat ko muskurahat mein daba kar wahan se uth gaee.

Sabh larkiyan doctor ban kar seat zaya nahe karteen. Kuch ko mahol acha mil jata hai to practice karti rehti hain. Kuch k agay option rakh diya jata hai. Ghar ya Hospital. Or vo apni tamam khuaishat ko daba kar, apni din-o-raat ki mehnat ko bhula kar apni priority apne ghar, shohar or bachon ko bana leti hain. Bachon k baray hone tak har mumkin koshish bhe karti hain k apne aap ko apni field se connected rakhain. Agar har larki apna naseeb jan pati, ye jaan pati k agay kesa mahol milega, shadi k baad job karna manage kr paegi ya nahe to shayad seat zaya karne wala masla pehle he hal hojata. Par shukar hai k ye mamla ALLAH ne apne hath mein rakha hai. Or har larki ko mauqa diya hai k vo future ki tension ko bhula kar taleem hasil karay. Chahay doctor banay, engineer banay ya BBA karay. Par taleem hasil karay. Jab Allah ne larkay or larkiyun mein taleem k mamlay mein farq nahe rakha to dunya ki pareshani to meri samjh se balatar hai. Apne occupation pe apni family ko priority dena har kisi k bas ki bat nahe. Or jo aesa karti hain, vo seat zaya nahe karteen, vo un uncle jese kayee logon k beton ko apne aap se zyada ehmiyat de rahe hoti hain.

Imperfect is Beautiful.

There are a lot of posts circulating around Facebook featuring advices these days. "Find someone who loves you this much, Find someone who believes you that much, Find someone who does this for you" and etcetera. So my question to all such advisors is, where do we go and order such custom made people? Honestly speaking, there is no such place and there is no one out there who fits our customization either. Our generation's mindset is being implanted with fake hopes and false beliefs. You cannot go out to search a suitable person matching your criteria. You should instead learn to accept people with their flaws. Except for Allah, all creatures have flaws. There is nothing like perfect in the outer world. It's all in fairy tales only. Real humans are imperfect. They make mistakes. They have all emotions in them, not just love. You simply cannot find a person who falls in Love with you at first glance. Your attitude makes a person fall in Love with you, every moment and every day. You do not get a perfect married life as a marriage gift. You create one. It's all upto you. Your level of tolerance decides how perfect your relationship would be. Don't give a heed to these Facebook advisors. I am sure none of them knows how beautiful it feels to accept and love people the way they are. Imperfect is beautiful.

Dard ka hadh se guzarna hai dawa hojana.

Bohat pehle kahen parha tha k Allah Pak ksi bhe insan ko uski bardasht se zyada dukh nahe detay. Par hamesha lagta tha k ye bat ghalat hai. Kabhe kabhe dukh is hadh tak barh jata hai k lagta hai bojh se dil phat jaega. Phr ye bat sach kese hoi? Bohat socha, phir ek fiqray pe nazar pari, "Khush rehna chahte ho to apne se neechay shakhs ko dekho". Tab samjh aya k bardasht se bahar dukh kiya hota hai. Humein zindagi ki choti choti pareshaniyan itni mayus or bojhal kar deti hain k hum bhol jate hain k hum kitni naimaton se ghiray hain. Bardasht se bahar dukh kiya hota hai vo koi un families se ja kar pochay jinhon ne kal PIA k hadsay mein apne ghar wale khoye. Koi us maa se pochay jo 9 maheenay bachay ka intezar karti hai, sbh tayyarian mukammal karke hospital jati hai or khali hath laut kr ajati hy. Koi dukh ki hadh us aurat se pochay jo toot kar apne shohar ko chahti hai or vo khufiya tor pe dosri shadi krke usay tor kar rakh deta hai. Dukh vo tha jo APS attack mein un masoom haseen bachon k maa bap ne jhela. Dukh vo hota hai jo ek borha baap apni jawan talaq yafta ya bewa beti ka jhelta hai. Allah ne waqai har shakhs k naseeb mein utna he dukh rakha hai jitna usko jhelne ki usay taqat di hai. Jab gham hadh se barhay to VO taqat bhe barha deta hai. Gham bara ho ya chota, ek din uska ehsas pehli bar jesi takleef dena bandh krdeta hai. Waqt acha ho ya bura, behraal guzar he jata hai.

Larkiyan mar he jati hain.

Jo kehta hai k larkiyan nazuk hoti hain bilkul ghalat kehta hai. Mujhe to larkiyun se zyada bahadur or ba-himmat koi makhlooq nahe lagti. Kis larkay mein itni himmat hogi k apne ma baap behen bhai sbh rishte chor kr ek anjan ghar mein anjaan rishte nibhane chala ae? Or un rishton k utar charhao mein itna kho jaye k apne aap ko bhol jaye? Koi ek bhe aesa mard nhe hoga is pori kainaat mein. Ho he nahe sakta. Phr larkiyan kese nazuk hoen? Apne baba k ghar mein raaj karne wali, zara zara si baat pe baba se lipat kar rone wali larkiyan shadi k baad ghanton takiyun pe munh chupa kar roti rehti hain par kabhe shikwa nahe karteen. Palat kar bhag nahe jateen. Pr rona bhe zaruri hai, gham bhe to halka karna hai. Subha uth kar phir vohe routine se chalna hai. Baba k ghar hoti to koi na koi akar poch leta, kiya hoa kiyun ro rahe ho, kisne danta? Par ab to rona bhe khud hai, hansna bhe khud. Amma k hote hoe majal thee kisi ki jo bura bhala keh jaye. Mere lye larh parti theen. Meri beti ko kese kuch kaha? Par ab to vo bhe majboor hain, kuch nhe kar sakteen. Sisak kar chup hojati hain. Beti ko mazboot banne ki dua dekar tanha chor deti hain. Par mazboot kese banun amma? Jab andar he sabh toot gaya hy to kahan se himmat laun? Mujhe kiun naazon se pala tha jab dunya k hawale karna tha? Bata dete pehle he, mere hissay mein agay mohabbat nahe. Sikha dete pehle he akele kese jeena hai. Kiun phoolon pe saja kar rakha tha jab kanton pe agay chalana tha? Sabh dilase jhoote hain. Sabh batain jhooti hain. Kabhe kuch sahe nhe hota amma. Larkiyan mar he jati hain. Bohat bahadur hoti hain. Par aksar maut se pehle, larkiyan mar he jati hain.

Mujhe aese jeenay ka saleeqa nahe aata.

Mujhe duniya mein rehne ka saleeqa nahe aata.

Log aksar kehte hain
Bht mazboot hona parta hai.
Bara gham sehna parta hai
Udasi chupani parti hai
Jhoota muskurana parta hai
Dil mein jitna bhe toofan ho,
Zabardasti dabana parta hai

Mujhe aese jeenay ka saleeqa nahe ata.

Munafiqat apnani parti hai
Chalaki dikhani parti hai
Jo nafrat kare usko bhe
Sar pe bithana parta hai
Har ilzam k jawab mein
Khamoshi dikhani parti hai
Jhooti tassaliyun se har bar
Dil ko behlana parta hai

Mjhe aese jeenay ka tareeqa nahe ata.

Zameer ko dabana parta hai
Har aib sikhana parta hai
Gunah kiya sawab kiya,
Har farq mitana parta hai
Apne maafad ki khatir,
Deen ko ghumana parta hai.

Mujhe dunya mein rehne ka saleeqa nahe aata.

Cakes I Bake.

I love cooking. Cooking is my ultimate passion. The only thing I seek in times of depression, desperation, anger and anxiety is cooking. It makes me happy. It makes me calm. I have been cooking ever since I was in grade 7. My first own creation was chicken burger. I was over the moon when my mamu (uncle) tasted it and started praising it like anything.

My first cake though was a complete disaster. It didn't rise and got burnt. Then came my younger brother to cheer me up and literally ate whole of that burnt cake. He kept on saying it tastes great, just need a little more practice. He insisted me to try again but out of fear, I didn't want to.

Then one fine day, I tried again. And this time, I made it inside a cooking pot over stove. The chocolate cake turned out really really amazing. Since then, I baked hundreds of cakes. On every friend's and family's birthday, I was requested to bake a cake. So you see, that's a legit reason to love cooking. It inspires you to keep trying.

My most famous cake is Moist Chocolate Cake. The recipe is not my own creation. I took it from a Facebook page years back. It always turns out amazing.

My mother-in-law doesn't like chocolate. So for her I tried a simple tea cake around 8 years back and that was a hit too. This was taught to me by a friend of mine. But I made some changes in the recipe to suit my taste. I often do variations with it. Like adding lemon zest to the batter to make it a lemon cake or dust cinnamon sugar on hot cake for that beautiful aromatic cinnamon cake.

Recently, I tried Malt cake by Maham. I was a little skeptical to try because of the ingredients in it but the reviews were so amazing I couldn't resist. I cannot describe in words how amazing the Malt cake turned out. Very soft and sinful.

I'll soon share the recipes of these on my blog.  So keep watching this space. Happy baking. :)

Ehsaas!

School life k zamanay se mein face reading karti thee. Pehle logon ko btati nahe thee phr batana shuru kiya to tafreeh k tor par doston ne ghar walon ki pictures dikha dikha kr face reading karwani shuru kardi. University mein logon ne itna aetbaar karna shuru kardia k meri judgement ki basis pe relationships banana or torna shuru kardye. Jis din mjhe pata chala k log mjhe itna seriously lene lag gae hain, mene facereading karna chordia. Allah se dua ki k ye hunar bhe mere lye wabal banjaega, mjhse isay wapas lelein. Aaj mein kitne logon ko dekhti hun k logon k baray mein apne opinions ki basis pe unki zindagiyan palat dete hain. Koi acha laga to bht gehra aqeeda bana lia k ye acha he hai, chahay vo kuch bhe karay. Koi bura laga to aqeeda bana liya k ye bura he hai chahay vo lakh achai karay. Apni judgement ko ghalat manne ko hum tayar he nhe hote. Or khud to mante he hain, logon k baray mein apne opinions pore confidence k sath propagate bhe kardete hain. Itni choti si bat hamari samjh nahe ati k har insan apni he ek jung larh raha hai. Koi pehli dafa mein aap se sahe se nahe mil saka to aap "First impression is the last impression" pe kaamil eeman la kar uski pori image ka sattyanaas banadete hain. Kia pata vo ksi bat pr pareshan ho? Kia pata tabyat sahe na ho? Kia pata ghar se larh kr aya ho? Kia pata sar dard se phat raha ho or apki batain uske sar pe hathore ki tarhan par rahe hon? Hum ye sabh nahe sochte, bas sochte hain to ye k mein to us se itnay achay se mila uske mizaaj he nahe mil rahe thay.

Saas - naimat ya zehmat!

Ek dost k haan beti paida hoi. Uske sas susar pehli bar dada dadi banay. Khushi ka koi thikana he na tha. Dost ki saas ne dost ki behen ko call ki or ghar bulwaya. Vo ghabra kar ghar gaee k Allah janay kia baat hogaee. Sas ne samne dhair sara sajawat ka saman rakhdia or kaha "beta, meri bahu or poti kal hospital se discharge hokar ghar aenge, tum please ghar saja do, mein unko surprise dena chahti hun".
Ye aurat, dost ki saas, isi muashray ka hissa hai jis muashray mein kitne gharon mein bahu ki pehli aulad beti hojaye to bahuon ka jeena haram kardia jata hai. Mene to suna tha k Allah sabh se bara munsif hai. Adal-o-insaaf ko pasand karta hai. Phir usne rehem bant'te waqt adal or insaaf kiun nahe kiya? Kiun kuch aurton k dilon mei bahuon k lye bepanah mohabbat or rehem dedia or kuch k dilon ko itna sakht bana dia? Kitni aesi sasain hain hamare muashray mein jo bahuon ko betiyun ki tarhan rakhti hain? Unki khushi mein khush, unke dukh mei dukhi hoti hain? Unki ghaltiyun ko rai ka pahar banane ki bajae pyar se samjha deti hain? Unko beton ki zindagiyun mein la kar jealousy ka shikar nahe hoteen? Shayad ungliyun pe gin li jaen, itni he hongi.

Mijazi Khuda!

Kuch arsa pehle Facebook pe ek post nazar se gurzi jismain baap k sacrifices ka zikar tha. Bilkul sahe post thee. Jitna maa aulad k lye sacrifices karti hai utna he baap bhe karta hai. Par hum admi ko credit sirf baap ki form mein he kiun dete hain? Admi har roop mein credit ka utna he haqdar hota hai jitna k aurat hoti hai. Aurtein samjhti hain saray museebton k pahar unpe he toot rahe hain. Vo bht compromise karahe hain, admi to laparwah hokar ghoom rahe hain. Aesa nahe hai. Admi bhe aurton ki tarhan har baat ko feel krte hain. Bas aurton ki tarhan har ksi ko bata kar gham ko halka karne ki koshish nahe karte. Gharelo maslon mein aurton se zyada admi pistay hain. Aurtein to phir ksi na ksi se keh kar dil halka kar leti hain, admi apne andar world war III larh rahe hote hain. Kaam k maslay nimta kar ghar atay hain to ek taraf se ghar wale dosri taraf se biwi apne apne maslon ka pitara lekr beth jati hai. Kiski sunain? Kisko sahe kahain? Kisko samjhaen? Kahan jaen? Apne he ghar mein sukoon na milna bhe bari aziyat ki baat hai. Lakin itna sabh jhelne k baad bhe hote bht dheeet hain. Aap lakh pochne ki koshish krlein, nahe batate k kiya baat ASAL mein pareshan karahe hai. Bahane bana dete hain. Kaam k maslay. Thakan. Sar dard. Badhazmi. Dost ne udhar liya wapas nahe karaha. Lakin yaqeen manain, ye sabh sirf bahane he hote hain. Insan k andar ka sukoon ghar k andar k sukoon se banta hai. Ghar k andar sukoon nahe to saray wujood mein thakan or udasi beth jati hai.

Ashraf-ul-makhlooqat

29 years ki zindagi guzar kar mujhe apna aap utna he samjh aya hai jitna k matric k student ko theorems samjh atay hain. Insan bari mushkil cheez hai. Kehne ko to hum bht aqalmand hain, ashraf-ul-makhlooqat hain par ye darja bhe mere khayal mein chand aik log he paatay hain. Baqi to khud ko sahe jagah fit karne k lye rubik's cube ki tarhan chakker he khate rehte hain. Zindagi mein sabh se zyada pareshan humein rishtay karte hain or hum hamesha se unko ghalat nibhate aye hain. Jiska masla ho us tak mehdud rakhne ki bajae sare rishte ek shakhs k lye ujaar dete hain. Behen se larai hoi, ammi pe ghussa utar dia. Ammi ne danta to behen bhai se baat bandh. Boyfriend se breakup hoa to friends ko chordia. Friends se larhai hoi to ghar walon se baat bandh. Exam mein fail hogaye to friends se naraz. Office mei din bura guzra to biwi pe ghusa utardia. Biwi se larhai hoi to bachon ko dant diya. Sas ki bat buri lagi to shohar se larh liya. Shohar ne kuch kehdia to bachay ko peet dia. Masi nahe ai to sabh ghar wale zad mein ajate hain. Ye reactions hum jaan bojh kar nahe detay. Lakin ehsas hone k baad inko justify bht achay se karlete hain. Asal mein hum sabh apne aap mein confused hain. Humein jo hasil ho us se zyada aziz hamesha la-hasil hota hai. Shayad hum khud k samjh jaen to waqai ashraf-ul-makhlooqat banjaen.

Rules for numbs.

If a person is telling you my story, he isn't actually telling you my story. He is telling you his own version of my story. Think before you believe.

If a person tells you I said this about something or someone, he isn't actually telling you what I said. He is telling you what he perceived from what I said. Ask before you believe.

If a person explains you a situation or an incident, he isn't actually explaining you a situation. He tells you what he absorbed from there. Question before you believe.

If a person describes someone to you, his description may not be real. What he describes is his opinion about that someone. Meet before you believe.

If a person tells you it's not worth it, it's of no worth to him only. It might mean everything to you. Take a chance before you believe.

Life as it is.

Ek friend ne bataya k usne jab se new hospital mein joining di, wahan k professor usay roz bula kar ksi na ksi bat pe dant'te. Kiun k uska ek colleague roz professor ko jhooti shikayatein lagata tha. So that, koi bhe us se zyada professor ki nazar mein acha na banay. Vo har newly appointed doctor k sath yehe karta tha. My friend realized k aesi situation mein kuch nhe kia ja sakta, toh usne professor ki dant ki parwah karna bandh krdi. Ek kaan se suna dosre se nikal dia.

Ye sirf ek professional Institute ka scenario nahe hai. Ye har joint family ka scenario hai. Kahen ek bahu dosri ko bura banati hai so that uski importance kam na ho. Kahen maa bahu ko betay or society ki nazar mein gira rahe hoti hai takay maa ki importance kam na ho. Kahen bahu saas ko husband ki nazar mein bura bna rahe hoti hai takay husband sirf biwi ko sahe samjhay.

Kuch khawateen fight krleti hain baqi sabar krke beth jati hain.. shayad waqt k sath parwah bhe karna bandh kar deti hain.. kiun k waqai aesi situation mein kuch nhe kia ja sakta. Par ek baat meri samjh nahe ati. Ye 50-60 years k professor, saas susar, hamari educated and civilized society itni si bat ko samjhte kiun nahe k dosre ki image kharab karne wala asal mein khud insecure hota hai? Kiun vo ksi ki baton mein akar dosre ko mujrim bna dete hain? Kiun logon ko khud pehchanne ki bajae suni sunai baton pe eeman le atay hain? Aesi situation mein logon ki aqal kiun ghaas charne chali jati hai?

In sbh "kiun" k jawab mujhe to nahe milte. Shayad kisi ko bhe na milte hon. Par mera eeman hai, jab koi hamari zindagi ki picture se rung mitane ki koshish kraha hota hai tabhe Allah Pak hamare lye ek new colourful zindagi paint kar rahe hote hain.

Mjhe to ye rule school life mein he samajh agaya tha jab ek dost dosre ki burai islye karti thee k mein sirf usi ki best friend bani rahun, dosri ko na banaun. Insecurity to insani fitrat hai. Isay agar samjhdari se handle krlia jaye to I am sure bht sare dil or ghar tootne se bach sakte hain. Lakin samajhdari dikhaye kon? Ghar k baray to khud bewaqoof hogae hain. Or samjhdari dikha di to melodrama or gossips kese karenge? Zindagi to pheeki parjaegi? Kuch krne ko he nahe mlega. Abhe kam az kam gheebatain karke time to pass hojata haina.

Khuda mera he hai.

Aksar aesa hota hai k mein ksi baat pe upset hon, dil udas ho, kuch hal na nikal pa raha ho ksi baat ka, bht sochne par bhe dimagh ksi bat ko accept na karaha ho or phr, facebook kholte he mujhe koi na koi motivational quote, inspirational video ya koi dil ko tassali dene wali tehreer mil jati hai. Jisay parh kar lagta hai yeh to 100% sahe baat hai.. or dil ka bojh foran halka sa hojata hai.. chahe waqti he sahe par becheni dur hojati hai.. Yaqeenan mein akeli nahe, kafi log k sath aesa hota hoga.. par ye koi ittefaq nahe hosakta.. ittefaq ek aad bar hoa karte hain, har baar nahe.. Mjhe lagta hai ye Allah ki taraf se uski banday se mohabbat or parwah ka izhar hai.. VO har lamha humse connected rehta hai.. bas hum he busy hojate hain.. vo janta hai kiya cheez uske banday k dil se uljhan mitaegi or itni lakhon posts mein se usi ko nazar k samne kar deta hai.. Halanke dil k sukun k lye usne Quran utara hai, jisay agar sukun hasil karne k lye parha jae to is se behtreen dawa koi nahe.. par hum sukun Quran k ilawa har jagah dhondhte hain.. Lakin iske baawajood, vo hamara sath nahe chorta. Chahay hum lakh ghaflat mein hon, chahay lakh dunya k peechay bhagain, chahay lakh totay rishte sambhalne ki koshishain karain par siwae Allah ki mohabbat k kuch bhe barhaq nahe. Sbh faani hai. Jhoot hai. Ek voe hai jo gunahgar tareen bandon k bhe dil ko sukun de deta hai.. Kash k mjhe bhe Allah se aesi he mohabbat hojae jesi k vo mjhse karta hai.. !

Taleem shaoor deti hai.

Aksar logon ka ye khayal hota hai k university se passout larkiyan ya zyada parhi likhi larkiyan bht tez hoti hain.. shadi k baad gharon mei barbadi macha deti hain.. akela rehna c
hahti hain.. ksi k sath compromise nhe karteen.. dimagh bht hote hai .. mein khud bhe ek doctor hun or to be precise medical graduate hon.. mene aksar logon ko apne munh pe or peet pechay yehe kehte suna hai.. mujhe herat hoti hain logon ki aesi soch pe.. taleem kabhe ksi ko baddimagh nahe banati hai.. taleem to nikharti hai.. agar aesa na hota to ilm hasil karna humpe farz nahe kia jata.. taleem humein shaoor deti hai.. or ye hamara shaoor he hota hai k koi hamare munh pe humein dunya bhar k ilzaam se nawaz deta hai or hum palat kr kuch kehte nahe.. balke mjhe to kabhe kabhe lagta hai k taleem humein apna he mujrim bana deti hai.. ksi ko kuch keh nahe sakte.. sabh Allah hawale krke beth jate hain sabar se.. ek baa'shaoor shakhs bezarar hota hai.. ksi ko nuqsan nhe deta.. kiun k jisko shaoor hota hai vo Allah se darta hai.. jo Allah se daray, uski pakar se daray vo shadi k baad ghar ko aabad karta hai.. barbaad nahe..

Makafat-e-Amal

Pehle mjhe lagta tha k makafat-e-amal hota he nahe hai. Ya hota hai to itna late k usko dekhne ki khuaish hum mein baqi nahe rehti. Lakin aesa nahe hai. Makafat-e-amal usi din se shuru hojata hai jab aap ksi k sath bura karte hain. Yahan aap ne bura kia wahan apka bura wqt shuru. Aap ne gheebat karte he phone rakha or peechay se awaz ai, bacha stairs se gir gaya. Sar phat gaya. Yahan aap ne ksi ko tanz mara wahan aap ka paon sofay se laga or nakhun ukhar gaya. Ouch! Sardiyun ki chot hai, baray din tak takleef degi. Shayad apka kia gaya tanz bhe bht arsay tak hurt karta rahay? Yahan aap ne kaam wali masi se dewrani ki burai ki, wahan apki bhabi kam wali masi se apki maa ki burai karahe hogi. Yahan aap ne ek dost se dosri k khilaf jhoot bola, wahan apkay miyan ka phone aya aaj din bara bura hai yar, koi kaam nahe horaha. Yahan aap ne ksi k pakaye khane mein aib nikala, wahan apka bht shoq se laya hoa suit tailor ne kharab kardia. Yahan aap ne shohar k kaan bharay, wahan apke apne bhai or ma ki larai horahi hogi. Aap dosron ko aziyat dete hain to apke apne bachay aap ko sata sata kar pagal krdete hain. Ye hota hai Makafat-e-amal. Or iska silsila kabhe rukta nahe. Apka diya hoa zakham ek din bhar jata hai. Par apki kartooton ki saza ka silsila kabhe nahe thamta.